🔰2022-2023 оқу жылындағы мектеп формасы

2022-2023 оқу жылындағы мектеп формасы 

Мектеп формасын таңдау кезінде ҚР Білім және ғылым министрінің 2016 жылғы 14 қаңтардағы №26 бұйрығына және «Білім туралы» 2007 жылғы 27 шілдедегі ҚР Заңының 5-бабының 14-1 тармақшасына сәйкес барлық орта білім беру ұйымдары үшін міндетті мектеп формасына қойылатын талаптар сақталуы қажет. 

Білім беру саласындағы мемлекеттік саясат қағидаттарын сақтау мақсатында Жамбыл облысының барлық орта білім беру ұйымдарында (гимназия, орта мектеп, лицей барлық мектеп түріне, бағытына тиесілі) оқушылардың(1-сынып) бірыңғай қою көк (темно-синий) түсті мектеп формасына көшуі енгізіледі. Дегенмен, оқушылардың алдыңғы оқу жылында алынған мектеп формаларын (күрең қызыл, сұр және т.б.) тозғанша киюге рұқсат беріледі, одан кейін кезең-кезеңімен (2,3,4 және т.б. сыныптар) жоғарыда көрсетілген қою көк түсті мектеп формасына ауысады.

Мектеп формасын бір өндірушіден сатып алу міндеттелмейді. Ата-аналар мен өзге де заңды өкілдер мектеп формасын тігетін кәсіпорынды немесе оқушы киімдерін сатып алатын сауда желісін өздері таңдайды. Бұл туралы білім беру ұйымдарының кеңестерінде талқыланып, айқындалады.

Ең бастысы, сатып алынған форма төменде жазылған талаптарға сәйкес келуі керек.

1. Мектеп формасының түсі –қою көк (2022-2023 оқу жылына 1-сыныпқа).

2. Мектеп формасының үлгісі классикалық стильде болады.

3. Ұлдарға арналған мектеп формасы:

Пиджак, жилет, шалбар, ақ салтанатты жейде, күнделікті ақ жейде, (қысқы уақытта: трикотаж жилет, ақ водолазка). Ұлдарға арналған шалбар еркін тігілген және ұзындығы бойынша тобықты жауып тұрады.

4. Қыздарға арналған мектеп формасы:

Пиджак, жилет, юбка, шалбар, классикалық жейде (қысқы уақытта: трикотаж жилет, сарафан, водолазка). Қыздарға арналған шалбарлар еркін тігілген және ұзындығы бойынша тобықты жауып тұрады.

5. Мектеп формасына орта білім беру ұйымының ерекшелік белгілерін (белгілер, тігіспелер, шеврон және т.б.) орналастыруға рұқсат етіледі.

6. Мектеп формасына түрлі діни конфессияларға қатысты киім элементтерін қосуға болмайды.

7. Мектеп формасына қойылатын талаптар бойынша жарақаттайтын фурнитурасы бар киім мен аксессуарларды киюге болмайды. (Ескерту.2-7 талаптар Қазақстан Республикасы Білім мен ғылым министрінің 2016 жылғы 14 қаңтардағы № 26 бұйрығымен бекітілген)